Madatopinfo

Araka ny didim-panjakana laharana 32731/2022/MEN navoakan’ny Minisiteran’ny Fanabeazam-pirenena ny 5 desambra 2022, izay mifehy ny tetiandro hanatanterahana sy fisokafana ary fikatonan’ny fisoratana anarana ho amin’ny fanadinam-panjakana CEPE sy BEPC ny taom-pianarana 2022-2023, dia ny talata 20 jona 2023 no hanatanterahina ny fanadinana CEPE. Hatao ny alatsinainy 3 jolay 2023 ka hatramin’ny alakamisy 6 jolay 2023 kosa ny fanadinana BEPC.
Mikasika ny fisoratana anarana dia misokatra ny alatsinainy 23 janoary 2023 amin’ny 8 ora maraina ka hatramin’ny zoma 24 martsa 2023 amin’ny 4 ora hariva izany ho an’ny fanadinam-panjakana CEPE, raha ny alatsinainy 30 janoary 2023 ka hatramin’ny zoma 31 martsa 2023 amin’ny 4 ora hariva ho an’ny fanadinam-panjakana BEPC.
Nandritra ny fanambarana nataon’ny Tale jeneraly misahana ny pegagojia eo anivon’ny Minisiteran’ny Fanabeazam-pirenena (DGP/MEN), Andriamikatsilavo Raoniherijaona, mikasika izany dia nanentana ireo mpianatra sy ray aman-drenin’ny mpianatra ary ireo talen-tsekoly izy amin’ny fikarakarana ireo antontan-taratasy ilaina amin’izany. Notsindriny manokana ihany koa fa mbola misy hatrany ny fanadinana CEPE raha ny rafi-pampianarana mihatra eto Madagasikara amin’izao fotoana izao. Mbola mandalo dingana maromaro kosa ny « loi d’orientation » entina manova izany rafi-pampianarana izany, izay manafoana ny fanadinam-panjakana CEPE.

826 no horaisina mpiasam-panjakana

Nampanantena ny Fitondram-panjakana fa ho raisina mpiasam-panjakana avokoa ireo mpampianatra izay manana ny mari-pahaizana MAPEN sy CAPEN nivoaka avy ao amin’ny « Ecole Normale Superieur » (ENS). Nohamafisin’ny Minisiteran’ny Fanabeazam-pirenena tamin’ny alalan’ny naoty izay nivoaka ny alatsinainy 5 desambra 2022 izany.
Araka ny fanazavana nentin’ny Tale misahana ny maha olona eo anivon’ny Minisiteran’ny Fanabeazam-pirenena (DRH/MEN), dia miankina amin’ny filan’ny Minisiteran’ny Fanabeazam-pirenena no andraisana ireo izay manana ny mari-pahaizana LAPEN.
Ho an’ity taona ity dia 338 ho an’ireo manana CAPEN, 288 ho an’ireo manana MAPEN, miisa 200 kosa ireo manana ny mari-pahaizana LAPEN raisina ho mpiasam-panjakana. Mitotaly 826 ny isan’izy ireo, izay ho tsinjaraina manerana ny Nosy. Tsara marihina fa eny anivon’ny lisea no hampianatra ireto mpampianatra nivoaka avy amin’ny ENS ireto.

M.R